22/12/2022 Thursday
該來就來 … part I
感謝一眾知我做記者出身後來轉教瑜伽嘅人善意建議
當然，我循例都有喺社交平台上亮下相，而正如上面提到，正正係做過記者呢個「包袱」令我諗多啲，特別在意寫啲嘢出嚟要帶到一啲訊息或者所謂營養，而唔單純只係hard sell同想招生意，於是那絕無僅有嘅po(一文兩用放咗係兩個英國香港人group)，就用香港各界別專業資歷喺外國證情況同能否銜接重操故業呢個新聞話題入手分享自己資料搜集成果。
此舉只係拋磚引玉，所得反應亦在預計，有興趣者會觀望開班資訊，表示如果時間地點啱會考慮參與，亦有人對買保險貴唔貴或瑜伽師資認證等事留言或私訊傾吓交流意見，最好笑係(後來我知原來呢類人咁樣去踢館都真係唔少)擺出一副「佢先知態度，所以要點醒你」之人士，提提醒人哋BNO唔可以教體育，姿態比英國政府更高更權威。
對此我深存感激，因為咁激勵我去發掘真相，一定係我唔夠努力加英文差因此忽略咗呢個關鍵，我再搜英國政府網頁相關欄目搵線索，講BNO Visa holder不能作為職業運動員或體育教練工作(you cannot work as a professional sportsperson or sports coach，從語境到正常邏輯去理解，點都睇唔到上述果類高人之一鎚定音。
文法上，明明個語境就係指專業運動員及教練，專業呢個term不就直接就係包含埋運動員同教練咩。
另外，無知一問，點解俾香港人入嚟但就特別唔俾教體育或運動，我想知原因。
關鍵一定在professional sportperson or sports coach呢度！事實上，專業運動員及教練之定義清楚明確無需爭議係代表國家/地區的精英，英國政府(相信各國亦如是)係設有專門簽證申請程序International sportperson visa去處理吸納呢班精英。
我將之回覆自己個原po，呀先知再衝出來話佢就唔會喎。
係呀我不聽人好言相勸~
總言之，虛心受教，努力學習(無論係語言呀基本邏輯同常識等等各方面啦)好重要，共勉之。
講番我自己。
回想十多年喺香港教瑜伽，有喺大型瑜伽集團做全職教員、以自雇方式同瑜伽館或健身中心合作，亦曾經由招生租場收學費開班教一腳踢。嚟到新環境面，當然要了解一下本地市況。
我用一貫相信同實踐之「治學」方式，直接查第一手資料先，同埋請本地教業界人士了解行業實況，所以英國政府網頁，特別係BNO visa相關資訊，同埋喺facebook入面本地瑜伽老師群組進行密集式「爬文」同埋直接發問，從而發現到更多需要知道事項，例如資格認證、保險、是否要有DBS check(類似犯罪紀錄)、稅務等等資訊，但即使呢啲只係實際就業市場狀況之冰山一角，至少俾我了解喺呢度教瑜伽為業種種具參考價值資料，實在感謝佢哋無私分享，亦因為咁獲得依家任職之瑜伽館老闆邀我教課。
目前每星期教兩堂，教室最多可以容納十個同學一齊練習，彷如十幾年前我最初踏足瑜伽教席的日子。
事實上喺呢度瑜伽館(唔計有提供瑜伽班之連鎖鍵身中心)大多數係獨立小生意，唔似香港同亞洲地區果種做到企業化市場咁大嘅規模。
喺本地瑜伽老師群組爬文同瑜伽館同事傾計，得知身兼數職之瑜伽老師都有唔少，有啲係multi-career叻人，但亦有唔少坦言教課以外另有工作方能維持生計，又或跑幾家瑜伽館、租社區會堂/教堂自行招生辦課。
類似狀況喺香港亦有，回想當初身為新手瑜伽老師，所獲得教學機會未足以糊口，自然要原本個正職支持生計。
依家睇番呢十幾廿年嚟瑜伽喺香港發展，的確說明香港(唔係2019年打後呢個「香港」)著實係個有好多機會嘅大城市，付出嘅努力累積教學經驗收穫亦可成正比，全職教瑜伽大有人在，既可支持生活亦有餘裕繼續進修。另一方面，有啲人則一直將瑜伽視為工餘兼職，因為兩個事業都能帶俾佢滿足感，唔一定為多出的薪水。
近半年喺呢度教瑜伽係點呢？
課室不同於香港啲studio有多面全身鏡(當然喺印度學校入面亦都唔會鏡牆處處)，授課語言亦同我喺香港時冇分別，都係用英文。回想自己教瑜伽生涯十幾年，從最初喺只得單一教室嘅小型瑜伽館到後來分館達十間之瑜伽企業任教，英文為主有時輔以廣東話雙語教學進行，正因為原本個香港真係國際化，此亦見諸於瑜伽課堂上，唔同國籍人士一齊上堂，呢個環境亦係個好好訓練場，所以即使嚟咗呢度教，喺我個人而言並無任何難適應問題，教課體驗自然順暢，只不過地點轉咗。
呀，仲有因應目前「後COVID時代」而出現網課呢樣新模式，依家每堂都係所謂hybrid class，即老師要兼顧親身嚟課室上堂同埋喺屋企睇zoom練習嘅同學，我相信全世界瑜伽課都咁運作。
待續
23/12/2022 17:05 Friday
My Christmas gift by yoga studio boss
24dec2022
該來就會來-part II
仲有幾日2022年就成為歷史，無論寫乜都會先記下年月日嘅我，喺踏入2023年初頭應該會好似細個果陣會寫錯年份，彷彿仲未意會到日子過得愈來愈快。
感覺過咗去呢三年幾仍然如夢似幻，人事物變化超出想象，期望有轉機嘅一啲嘢卻硬係未見影......
前幾日有一晚我教完瑜伽喺寒風中等巴士，突然間腦內浮現類似收工畫面，係前年尾教完課係上環收工，果時我慣常會沿住文咸東街經皇后大道中落中環先搭地鐵站返屋企，由比較靜嘅上環行到仍然熱鬧嘅中環。
我自問自答：
今年初我點會諗到自己年尾可以教番瑜伽，
不過地點已經變咗喺千里之外一個溫帶島國？
上述呢番話註解：
疫情呢幾年瑜伽館能否開放變得好被動，而喺2021年低到今年初，係其中一個稍為放寛時期，果時我都仲係一星期教五晚，不過，喺政府令下包括瑜伽館在內所有健身中心喺7/1/2022（咁清楚係因為喺記事薄上我喺呢日寫住force shut down, again 
）又再次被勒命關門。
）又再次被勒命關門。係，真實又好虛幻。
諗到呢度又暫時唔想寫，有點emotional
待續
